الفخامة لما تدخل على السوشيال مش بتيجي من إنك تقفل الإشعارات…
الفخامة بتيجي من إنك تخلّي اللي بيكتب لك يحس إنه داخل يناقش دكتوراه، وأنت في الحقيقة آخر إنجاز عملته في حياتك لما جيبت 6 من 20 في امتحان علوم 2 إعدادي ترم أول.
اقرأ أولا مقال: كيف تكتسب الفخامة في 10 قواعد… وأنت لابس ترينج ومروح من الفرن!
واقرأ أيضا مقال: ازاي تبقى مشهور في 10 خطوات.. من غير موهبة ولا ضمير ولا حتى إنترنت قوي!
خليني أديك القاموس والقواعد، وهنمشي خطوة خطوة مع بعض:
أولًا: المبادئ الستة العُليا لردود الباشوات
1. ما تستخدمش رد جاهز… استخدم رد مُبهر!
ما تقولش:
“شكرًا”
قول:
“أُقدّر حروفك التي حملت لفتة نبيلة… امتنان لا يُختصر في كلمة…”
طب ليه؟
عشان شكرًا دي قصيرة، والفخيم مش بيقصّر في الكلام ولا حتى في النبرة!
2. خليك موافق حتى في الرفض… بس بترقية الكلام
حد قال لك:
“ده كلام فارغ!”
ما تردش تقول:
“لا، كلامي مش فارغ!”
رد:
“تفريغك لمعنى الحديث لا يُقلّل من اتّساعه… الفراغ أحيانًا وعاء للتأمل…”
كده إنت ما أنكرتش إن كلامك فاكر… إنت ارتقيت للنقاش لفوق، حيث الأكسجين أقل والمعنى أوسع!”
3. رد على السؤال بإعادة تعريف السؤال نفسه
حد كتب:
“ليه كده؟”
أوعى تجاوب مباشرة وتقول “كده”!
رد:
“ولماذا لا يكون هكذا؟ أحيانًا إجابة السؤال هي السؤال ذاته…”
الناس هتدوخ… بس هتدوخ بإعجاب، مش بعصبية!
4. الثقة قبل المعلومة… والهدوء قبل الإثبات
حد قال:
“إنت واثق من كلامك؟”
ما تقولش:
“آه واثق”
قول:
“الثقة ليست قرارًا… بل حالة نعيشها بلا ضجيج…”
وتكتبها كده بهدوء، من غير Emoji حتى!
علشان الفخم الـ Emojis بتاعته في قلبه، مش على الكيبورد!
5. لو الكومنت هجومي… خلي ردك اختراعي سلمي دفاعي… ازاي معرفش!!
حد شتمك شتيمة شعبية (اللي هي أصلها مش لذيذة ومنقدرش نقولها هنا احترامًا للذوق العام 😄)
إوعى تشتمه تاني!
رد كده:
“الحدة لا تليق بحضورك الراقي… ولذا أعيد لك كلماتك بلا انعكاس…”
يعني إنت ما هاجمتوش، إنت مشيت بقاعدة عبيله واديله بس بطريقة فخيمة!”
6. العُمق مش في الإجابة… العُمق في إنك تخلّي اللي قدامك يشك إنه قليل
حد قال:
“كلامك مش مفهوم!”
رد:
“الفهم ليس دائمًا لحظيًا… بعض المعاني تتجلّى بعد حين…”
كده إنت ما استهزأتش…
إنت وعدته بالنور بعد الظلام!”
يعني اقرا الكلام عشرة خمستاشر مرة يمكن تطلع منه بفايدة .. وهو مش هيعمل كده أساسا!
ثانيا: الردود النموذجية حسب نوع الكومنت
دلوقتي التطبيق العملي، اللي هو أهم من النظري، لأن الفخيم بدون تطبيق يبقى فخم في الفراغ.. (ودي توصيف فخم أصلًا!!)
🎯 لو الكومنت بيحييك:
“جامد يا فخم!”
رد:
“التماسك الذي تحمله كلماتك أراه بوضوح… دام لك وهج الرؤية!”
يعني: أنا في الحقيقية فخم .. وشايف نفسي فخم .. مش مستني شهادة من واحد زيك!!
🎯 لو بيثني عليك بس بهزار:
“ماتقلّش مننا يا باشا 😏”
رد:
“لا أقلّل من شأن أحد… وشأن الرفعة ليس ادّعاءً بل طبيعة، وأنت أهل للتقدير!”
يعني: أنا مش بقلل من حد برغم إني في مكانة أعلى منكم كلكم بس نعمل ايه؟؟ هو كده اشترى منك خلاص!
🎯 لو بيساعدك أو بيعملك تصحيح:
“شكلك قصدك كذا…”
رد:
“رؤيتك ثاقبة… الثاقب يرى ما بين السطور قبل ظاهر الحروف، وإشارتك مسدّدة!”
يعني: أنا غلطت .. بس هو مين؟؟!! هو فيه فخم بيغلط؟!! والله ما هنولهالك أبدا!! أنا مبغلطش .. دا حتى غلطي صح!
🎯 لو بينقدك نقد محترم:
“الموضوع محتاج تفصيل أكتر”
رد:
“تفصيلك للمعنى أُقدّره، فالدقة باب من أبواب الجمال وليست من أبواب النقص!”
طب ليه: كده أنت سحلته في منطقة تانية هتخليه يندم انه انتقدك اصلا.
🎯 لو بيهاجمك:
“إنت عامل فيها شخصية!”
رد:
“الشخصية ليست حلّة نرتديها… بل أثرٌ يظهر رغم المحاولة!”
طب ليه: كده أنت بتشتت تفكيره من خلال محاولة ربطه لإجابتك بسؤاله… لأنه لو معرفش يربط دي في حد ذاتها بالنسبة له كارثة.
🎯 لو بيستفزك:
“هو إنت بتفهم ولا بتقول كلام وخلاص؟!”
رد:
“القول عندي تلخيص للفهم… ولولا الفهم ما استقام القول!”
يعني: البيضة الأول ولا الفرخة ودوخيني يا لمونة!!
🎯 لو بيهزّر عليك:
“يا عم سيبك… ده إنت فخم من أيام روضة البراعم 😂”
رد:
“بذرة الجودة تُغرس مبكّرًا… وأنت تشهد لها بظرف جميل!”
يعني: أيوه أنا فخم برغم أنفين أنفك .. بس انت كراجل فخيم محترم مبتحبش تجيب سيرة المناخير في الكلام.
🎯 لو بيسألك عن مصدر (وده الأغلب):
“المصدر؟!”
رد:
“المصدر تجلٍ ذاتي… لكنه يمكن أن يُروى لاحقًا إن أذنت المعاني!”
يعني إنت ما قلتّلوش مفيش مصدر؟ لأن مفيش مصدر أصلا!!
إنت عملت مصدر افتراضي في المستقبل!”
🎯 لو بيسألك سؤال صريح:
“إنت رايح فين بعد ده؟”
ما تردش تقول:
“البيت”
رد:
“المسار لم يُحسم… بعض الطرق تُختار بعد أن تُعاش.”
يعني: متحشرش مناخيرك في حياة الفخمين.. دول محدش بيسألهم أصلا!
ثالثًا: خد بالك… التعليقات اللي المفروض تحذر منها وترد عليها بفخامة جامدة
⚠ لو بيقولك: “طالب شهرة! أستاذ في الهبد!”
الرد:
“الهبد فنٌ إن ضبطت له الإطار… والفخامة إطار قبل أن تكون لوحة!”
كده إنت اتحوّلت من متّهم لمُنظّر!!
ومتسألنيش عن المعنى أصلا… لأن أنا كفخيم مش فاهمه فما بالك بعامة الشعب اللي زيك!!
⚠ لو قالك: “فخامتك دي بڤلاتر ولا أصلية؟”
الرد:
“الفلتر يُجَمِّل… لكنه لا يخلق حضورًا من عدم!”
يعني: أنا فخم غصب عنك يا رخم!
⚠ لو قالك: “الدنيا بتضحك عليك وإنت فاهم إنهم منبهرين بيك!”
الرد:
“إن كان الإبهار ظنًا… فالانبهار عندهم يقينُ تأويل!”
يعني: انت اللي بني آدم مبتفهمش .. ودا مش ذنبي طبعا!
ومن أهم ملحقات الفخامة:
- ما تحاولش تبقى “محبوب”… حاول تبقى “مُقدَّر!”
- ما تحسسّهمش إنك شايف نفسك “كبير”… حسّسهم إنك شايفهم “قادرين يفهموا الكبير!”
- ما تردش وانتهينا… ردّك لازم يبقى كأنه بداية نص جديد، مش نهاية نص!”
جاهز؟ كده أنا سلمتلك روشتة فخامة الردود.
ابهرني بأه يا عم الفخيم!